Sci, la Ladinia à na leteratura, cun „tlassics“ y „moderns“ che possa bele da n struf incà se museré cun la leteratures ntëurite. Ma chi cunësc pa chësta leteratura scrita te na „rujeneda sucrëta“?
Rut Bernardi, scritëura y da juni dl 2021 a cë dla Lia Autores dl Südtirol ne se stancia nia a nes mëter dant l spiedl per mustré su i cunfins dla leteratura ladina cun la paroles dl scritëur olandesc Cees Nooteboom: „La leteratura de n pitl raion ne sarà tl fulestier tan giut nia prejënta, finche la ne unirà nia cianceda. […] Zënza traduzions mé libri te na rujeneda sucrëta.” Chësc sarà l fil cuecuin tres la sëira leterera metuda a jì tla bibliotech de Persenon per prejenté poejies y prosa dala Ladinia a nteressedes y nteressei de rujeneda tudëscia y taliana.
Ntan la prima pert dla sëira leterera puderan audì poejies de autores che vën tla leteratura ladina ntant bele ratei coche „tlassics“ y tla segonda pert autores de ncueicundì de trëi valedes ladines: Iaco Rigo, Nadia Rungger, Claus Soraperra, Jasmin Ferdigg y Ivan Senoner cun poejies y prosa per ladin y tudësch o talian.
Prugram:
Dala 19.30:
I „tlassics“ dla leteratura ladina
Max Tosi (1913–1988)
Luciano Jellici (1928–2006)
Frida Piazza (1922–2011)
Felix Dapoz (*1938)
Dala 20.00: Cheder dla leteratura ladina d’ al didancuei:
Iaco Rigo, Prosa lad.-mareo y tudësch
Nadia Rungger, Lirica lad.-gherdëina y tudësch
Claus Soraperra, Lirica lad.-fascian y talian
Jasmin Ferdigg, Lirica lad.-badiot y tudësch
Ivan Senoner, Prosa lad.-gherdëina y talian
La sëira leterera unirà metuda a jì per ladin, tudësch y talian.
La sëira vën metuda a jì dal ZeLT (Zënter per leteratura y traduzion dla SAAV) n culaburazion cun la Bibliotech de zità de Persenon y cun l sustëni dl Assessorat per la Cultura Ladina dl Südtirol.
N puderà mé unì a scuté su cun l „Green-Pass“ y l mascherot, se nunzian al numer de telefon: 0472 062190; o tres e-mail: biblio@brixen.it
